كيف تضيعين مكياجك

7529 13

المعجبات بهذه المشاركة

0

1 - أول خطوة لازم تعمليها قبل متحطى أى ميكب هو أنك تغسلى وشك كويس بمنظف مناسب لنوع بشرتك.. لازم البشرة تكون نضيفة عشان الاوساخ و الدهون متتراكمش و تسبب ظهور للحبوب.. بعد استخدام المنظف بتستخدمى كريم مرطب لبشرتك و ده برضه على اساس نوع البشرة.. فيه كريمات مخصوصة للبشرة الجافة و العادية و كريمات للبشرة الدهنية..

بعد متحطى الكريم على بشرتك استنى ثوانى لحد ما البشرة تمص الكريم.. و بعد كدة بتبدأى تحطى خافى العيوب ( الكونسيلر ) على الحبوب او النمش او البقع الغامقة اللى فى بشرتك و تمزجيه كويس لحد ما البشرة تمصه و ده هيقلل كتير من احمرار الحبوب و هيخفى اى عيوب تانية.. بعد وضع الكونسيلر بتحطى على وشك كريم الأساس او البودرة المائية اللى لونها مناسب للون بشرتك

2 - تانى خطوة بتعمليها أنك تجيبى الكونسيلر مرة تانية و تحطيه تحت عينيكى على شكل نقط بطول الخط اللى تحت عينيكى.. و تمزجيه كويس لحد ميختفى أثره.. ده بيخفى الهالات السودة و بيدى نور أكتر لعنيكى

3 - تالت خطوة بتجيبى بودرة عادية و بتمشيها على وشك كله.. ده بيثبت الكونسيلر و بيقلل اللمعان

4 - رابع خطوة بتجيبى حاجة اسمها ( البرونزر ) ده زى أحمر الخدود ( البلاشر ) بس لونه برونزى.. بتحطيه فى المكان اللى باين فى الصورة رقم 4.. ده بيدى بروز أكتر لعضم وشك او ممكن تستخدميه على خدودك عادى و ده بيدى لون برونزى جميل

5- خامس خطوة بتحطى بلاشر على خدودك و ده بيدى لون وردى و يبين وشك انه صحى أكتر

6 - سادس خطوة بتحددى حواجبك.. بيبقى فيه اقلام مخصوصة للحواجب او بيبقى بودرة و جيل مع بعض و معاهم فرشة بستخدميهم لحواجبك.. تحديد الحواجب بيدى جمال أكتر لعنيكى و يبينها

7, 8, 9, 10 - سابع خطوة بتحطى الاى شادو باللون المناسب ليكى .. لو تحبوا ممكن أتكلم بتفاصيل أكتر عن طريقة وضع الاى شاو

11 - تامن خطوة بتحطى محدد العين ( الاى لاينر ) و ده بيبقى باللون الأسود او اى لون تانى تحبيه

12 - تاسع خطوة بتحطى كحل جوة عنيكى عشان يدلها جمال و تحديد أكتر

13 - عاشر خطوة بتحطى الماسكرا على رموشك عشان تديلها طول و جمال أكتر

14 - اخر خطوة بتحطى احمر الشفاة ( ليب ستيك ) او ملمع الشفاة ( ليب جلوس ) باللون اللى تحبيه

ده طبعا ميكب كامل و مش لازم تعملى كل الخطوات دى ممكن تختارى خطوات معينة بس و تمشى عليها.. :) يارب تكون الخطوات دى فادتكوا شوية و عجبتكوا :)

dina magdy
المتابعين 52

  إبلاغ عن إساءة   |     ارسال لصديق