العناية بالبشرة

3242

اولا اول حاجه لما بنصحى من النوم (التنظيف)
بعد ما تغسلى اسنانك بالمعجون ويفضل انك تحطى على المعجون نقطتين ليمون او عسل
تبدأى تغسلى وشك مش تغسلى وشك بشويه مايه وخلاص كده لا فى خطوات ودى يوميا وهى
1 سنفره للوجه ( ودى ممكن بأى نوع سنفره يناسب بشرتك ولو مفيش فممكن بملح الحليب او ملح ناعم + زيت زيتون وعصير ليمون ) ومننساس ايدينا
2 بعد السنفره نغسل وشنا بغسول او صابونه مناسبه لنوع البشره
وبعدين نشطف وشنا وايدينا كويس بالميه
ونروح وهى ادينا لسه مبلوله نحط بالقلم الابيض بتاع الضوافر نحط تحت الضوافر كويس عشان نعمل اللوك الفرنش
وبعدين ننشف وشنا وادينا كويس بس بالطبطبه مش عايزين حك
3 وبعدين نحط تونك على وشنا بقطعه قطن ولو مش موجود ممكن نستعمل ماء الورد بس دايما خلى الازازه فى الثلاجه
وفى حاجه كمان جميله هى مكعبات الشاى الاخضر المثلجه ( بغلى شاى اخصر فى شويه ميه وبعدين اصفيه
واحطه فى قالب مكعبات التلج فى الفريزر )
دى بجد ممتااااااااااااازه للعينين بمشى الثلجايه على جفونى من فوق وتحت بس كده وتسيبيها تنشف على عينك مش تنشفيها بالفوطه
*مميزاتها انها بتفتح حول العين وبتزيل الانتفاخات وكمان لما بحطها بحس ان رموشى واقفه كده تحسى انى حاطه مسكارا شفافه

ثانيا (الترطيب)
بتحطى كريم مرطب للوجه بردو لا زم يناسب نوع بشرتك وكمان للايدين للرجلين
وماننساش زبده الكاكاو للشفايف

فى وسط اليوم
بتغسلى وشك بالغسول بس وتشطفى كويس وتحطى التونك
وتحطى مرطب للأيدين بعد ما تنتهى من شغل البيت

نيجى بقى لقبل النوم
لو فيه مكياج شيلى المكياج بمزيل مكياج ولو معندكيش مزيل مكياج ممكن بزيت الزيتون او باللبن او باللوشن بتاعك
بعدين نغسل بالغسول وننشف وشنا وبعدين التونك
وبعدين نحط كريم مرطب للوجه والايدين ونحط كريم تقيل شويه للرجلين ونلبس عليهم شراب قطن وخاصه فى الشتا او للى عندهم تشققات
ونحط زبده كاكاو للشفايف
ونحط مقوى اظافر او ندعك ضوافرنا بالليمون وبس كده ننااااااااااااااااااااااااااااااااااام

*حاولى بقدر الامكان تعملى ماسك للوجه مرتين فى الاسبوع ماسك مغذى او ماسك للتفتيح او ماسك للترطيب او لشد البشره اختاااااااااااااااااااااااارى اللى بتفضليه

*حاولى برده تعملى باديكير للرجلين والايدين مره او اتنين فى الاسبوع
حسب احتياجك بتحطى رجلك او ايدك فى ميه سخنه فيها معلقين زيت زيتون وليمون لمده نص ساعه وبعدين بتنشفى رجلك بالطبطبه وتشيلى الجلد الميت من كعب الرجل ب الـ pedegg وتشيلى الجلد الميت حوالين الضوافر وبعدين تحطى كريم مرطب

الاستحماااااااااااااام
غسيل الشعر
اولا بتخففى الشامبو بشويه مايه وتغسلى بيه فروه الراس كويس وتشطفى
وبعدين بتحطى بلسم او حمام كريم ( يفضل مرتين فى الاسبوع مره بلسم ومره حمام كريم )
وتسيبيهم على شعرك لحد ما تغسلى جسمك
غسيل بشره الجسم
اولا سنفره (ملح ناعم + زيت زينون + ليمون ) او اى خلطه تانيه
او ملح الحليب
وبعدين تشطفى جسمك وتبدأى تغسليه بالليفه ويسلالالام لو ليفه مغربيه بشاور جيل كويس
وبعدين تغسلى رجلك كويس جدا بالحجر الخفاف
وبعدين تبدأى تشطفى شعرك وجسمك كويس جدا جدا
ويفضل اخر شطفه الميه تبقى بارده مش سخنه ولو مش ها تقدرى فى الشتا ده
فعلى الاقل اشطفى شعرك ووشك بميه بارده عشان نقفل المسام
ونشفى جسمك ولفى فوطه على شعرك
وحطى بقى لوشن حلو للجسم
والمنطقه الحساسه حاولى دايما يبقى فى الحمام ازازه فيها زيت زيتون او جلسرين على ليمون
تحطى منها للمنطقه الحساسه (تفتيح وترطيب )
تماااااااااام كده

نيجى بقى للشعر اولا ما تسرحيش شعرك وهو مبلول استنى لما ينشف و بعدين حطى كريم للشعر وسرحى شعرك تانيا حاولى تعملى ماسك او حمام زيت للشعر مره فى الاسبوع ده حمام زيت كويس جدا

بيضه +ومعلقتين زيت خردل+معلقتين زيت زيتون او جوز هند+ومعلقتين زبادى+ معلقتين عسل نحل
خليها ساعتين
واغسلى شعرك بعدها مش بالشامبو لا بالبلسم اشطفى مرتين لحد ماينظف

ولو لتساقط الشعر
عصير جرجير + 2 معلقه من حمام الكريم اللى عندك +2 معلقه زيت زيتون +2 معلقه زيت خروع
ولو تحبى ممكن تضيفى زيت الثوم بجد روووووووووووووعه بس المشكله فى ريحته

انا خلصت كده يا بنات :)

Princess Zozo
المتابعين 50

  إبلاغ عن إساءة   |     ارسال لصديق